李嘉欣今日喺環球貿易廣場出席一間食肆開幕，左右手都戴上鑽戒，加埋一對閃令令耳環，令佢閃爆會場，嘉欣表示最叻係整日式餃子：「爹哋（指老公許晉亨）鍾意食，但我又懶，所以喺特別日子先整，佢（囝囝Jayden）好想見到媽咪煮嘢畀爹哋食，會表現得好開心，好興奮，成屋走，好天真，佢都有試過整糖粉玫瑰花跪喺地下畀我，我好冧呀！」

會唔會同囝囝演出真人騷？嘉欣指Jayden開咗學，同埋做真人騷嘅小朋友比較細，覺得Jayden已經超齡。嘉欣又表示Jayden有少少表演慾，鍾意大家將集中力注意喺佢身上，佢話：「Jayden鍾意玩魔術，雖然有少少穿崩，但可愛已經加分，其實佢有揀興趣班，第一揀咗魔術，跟住再揀中華飲食文化，因為一定有嘢食，好鍾意食嘢，但又唔肥。」有冇玩魔術o氹長輩？嘉欣笑住話：「唔使o氹，佢出現喺面前，已經笑到見牙唔見眼，已經冧晒。」

嘉欣透露最近又抽到新馬，不過改名就由老公負責。提到對上一次跟老公入馬場撐老爺嘅愛駒「估惑」，可惜「估惑」跑包尾，嘉欣話：「有少少失望，好想老人家開心，因為贏咗就係第100場，不過叫緊糊都好開心，當然我想佢快啲有呢個開心，但係跑馬好難講。」