利物浦中場阿歷士張伯倫喺禮拜六紅軍主場2:1反勝李斯特城場波後，俾領隊高路普從後雙方抱起。原來呢招係有名堂㗎，阿歷士張伯倫叫做「高路普熊抱」！呢位英格蘭中場賽後喺個人Twitter發推文，話當「高路普熊抱」出現嘅時候，你就知道球隊踢咗場好波喎！

事實呢位德國籍主帥賽後亦都猛讚一班球員嘅表現：「你梗唔想落後0:1㗎，但如果你喺比賽咁早階段就落後0:1，你希望睇到球員交出好似今晚咁嘅回應，今場波係我哋喺落後0:1嘅所有情況下所表現出最好嘅回應。成隊波嘅表現非常好，我無見到一位緊張嘅球員，或者任何負面嘅反應，我哋一直努力，製造機會同踢出漂亮嘅足球，防守上都好硬淨。」

高路普繼續話：「李城最強嘅就係反擊同行軍速度，我哋落後0:1真係啱晒佢哋，呢一點亦都令比賽變得更加困難。我哋做得好好，上半場除咗個賽果之外我好滿意，呢場波百分之百係我哋咁耐以嚟踢得最好嘅其中一場。」

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM