莊思敏同趙碩之等噚晚到尖沙咀出席新戲《非常盜》首映，莊思敏稍後同鄭中基合作拍新戲，扮演便衣女警，咁同佢有冇感情戲？莊思敏笑話：「我唔搞人老公喎。」

另外，喺無綫節目《求愛大作戰》中做形象導師嘅「綠魔」Karl，因不男不女俾觀眾圍插，曾同佢合作嘅莊思敏話：「我冇睇到節目，但知乜事，我有whatsapp佢咩事，佢答我都係搵飯食，咁佢着衫有個人特色。」Karl被圍插兼累TVB收唔少投訴，莊思敏話：「有人睇係好事，有投訴咩，咁我安慰吓佢。」至於趙碩之就話依家已經無約喺身，公司老闆林建名放佢走，但提到老闆好嬲，趙碩之話：「可能佢唔知乜事，好彩佢體諒，只怪我講嘢太直。」