全國政協副主席梁振英日前宣佈，全額資助舉英國旗嘅示威者坐飛機返英國，名額10個、先到先得。可惜正如前議員梁國雄形容，689講嘅嘢「跟野獸排泄係冇分別」，即係唔算數。所謂上樑不正下樑歪，689嘅支持者亦都一樣。

689喺社交網站話，向所有喺香港遊行示威時舉英國旗嘅香港人送免費機票，今個月出發、下個月返港，反應好會再擴大個計劃。有梁粉就留言話送出第11個名額，限定舉英國旗嘅廢青暴徒，仲話只送單程機票。

講到明資助暴徒喎，咁咪即係協助逃犯？網名「圓咕碌」前中大學生會常務幹事黃于喬（Emilia）就向梁粉挑機，表明自己係港獨廢青暴徒，要求頭等單程去英國機票，或者折現都得，順手仲提供埋付款方法。

結果梗係無人找數啦，Emilia仲促請689及其支持者遵守承諾添。不如慳番啖氣啦，689做特首嗰陣夠話適時披露外部勢力參與佔中嘅證據，八方等到佔中三子之一嘅陳健民放監都未等到，Emilia慢慢排隊先。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此