吳彥祖、衛詩雅同大陸演員王千源主演電影《限期破案》噚晚喺江門進行開鏡儀式，一眾演員同投資者現身活動。

吳彥祖和妻女一家近幾年喺美國生活，甚少喺香港露面，期間到愛爾蘭開拍美劇，一有時間就返回美國陪伴現年89歲嘅爸爸。 今次重投亞洲電影懷抱， 吳彥祖話：「好掛住香港同埋香港嘅拍攝方式，好efficient（效率高），亞洲製作權力喺導演身上，外國就好多細分，有啲唔慣，每兩集換導演，大家唔會有好長久嘅關係。雖然拍美劇都好玩，但自己香港出身，我好尊敬香港電影，其他地方拍唔到香港嘅味道，我好掛住。」戲中吳彥祖有不少打鬥戲。

喺大陸開工吳彥祖妻女沒有同行，佢話：「今年係囡囡第一年讀幼稚園，幫囡囡報讀咗中文學校，學中文唔可以缺少，我唯一後悔細個冇學好中文，唔想阿女大個後悔。」至明年中吳彥祖會再次投入美劇劇組開工，而香港嘅生意一直有運作，仲透露下個月會開設新酒吧。

吳彥祖早前到希臘參加好友謝霆鋒真人騷《鋒味》做嘉賓，佢話：「 三、四年冇見佢，再聚頭都講番好多以前做o靚仔時候嘅回憶，好touching，我冇喊，有眼濕濕，大家都有傾合作，想開拍《特警新人類3》，今年係套戲二十週年，想預埋馮德倫，依家係《特警老人類》。」

衛詩雅擔正做女主角份外緊張，特別用三個月時間訓練體能操肌，連健身教練都話太癲狂，佢話：「我唔想輸，身邊全部都係男仔，得我一個女仔，見到其他演員手瓜等於我腳咁粗，我飲埋奶粉，戒油、鹽、糖希望操大隻啲。」仲指做打女多條出路會更好。同吳彥祖有對手戲，衛詩雅笑指：「其實幾年前我喺電影《沖天火》都做過佢老婆，仲死埋，依家回魂返嚟係佢前妻喇，佢不嬲都咁靚仔。」

另外王千源同吳彥祖戲中關係複雜，吳彥祖喺台上面仲話：「我整天就坐在他大腿上。」飾演警察嘅王千源解釋：「只是一些對抗場面，大家會互相追逐。」王千源首次同吳彥祖合作，佢話：「以前對他印象是好漂亮，今次合作很多女生都來電說想要他簽名，我們拍攝後覺得他給我一種不一樣的感覺，不用開工時，我們會說小孩和家裡事情還有教育，我還說他普通話說得差。」王千源雖然身形魁梧，不過佢話唔擅長拍打戲，要好好練習功夫。

精選娛聞，喺晒《娛果》
http://fb.com/appledailyent