郭炳江上一次喺09年嘅股東會尋求連任,反對票只得1.8%,涉及3297萬票,事隔三年,噚日股東會上竟然有3.76億票或21.5%反對佢連任,11位重選董事當中,佢獲得最多反對票,排第二係恒基地產(012)主席李兆基,有12.4%股東反對四叔連任。由於噚日另一位聯席主席郭炳聯同非執董郭炳湘冇尋求連任,好難估計反對郭炳江連任嘅股東,係咪因為廉署單官司還是郭氏三兄弟不和而投反對票,但無論乜嘢原因,睇來三位都要思考吓股東點解咁唔妥,舊年股東會亦有14%股東反對郭炳湘連任㗎。雖然有咁多股東唔like,但員工應該仲好鍾意郭炳江,事關佢噚日預告明年加薪應該唔錯。郭老闆咁講得,反映新地盤數幾靚。早前被踢爆疑似係新地股東嘅九倉(004)主席吳光正應該唔使愁。為免市場有乜誤會,郭炳聯自爆同吳光正係老朋友,又指新地抵買,希望多啲人買㖭呀。李華華mailto:
[email protected]