由於臨近年尾嘅關係，呢排突然多咗好多新股趕住上市，𠵱家個市淨係得藍籌股有炒作，波幅又唔大，有部份散戶嘅資金就轉咗去啲新股度。近排上市嘅新股都有唔錯升幅，有好多原本都唔知係乜嘅股票都上市，令到個魚缸多咗好多不知名嘅股仔。
上個禮拜二上市嘅蜂蜂天然生命（8156），上市前兩年嘅業績都係一般，但上年營業額就升咗成6倍幾，盈利就更加升咗11倍有多。如果就咁單睇個數字，就真係幾值得買呢隻股票，事關未來盈利如果可以持續嘅話，就會以幾何級數咁上，過多幾年個盈利咪唔講得笑？

買蜂蜂要識轉身
聽個朋友講，喺上市前，間公司開過分析員午餐會，有位仁兄問過呢件事，但班管理層一聽到個問題就成塊面燶晒，之後點？當然係顧左右而言他啦。

睇番呢隻股仔上市後嘅表現，除咗喺上市嗰日走勢好啲之外，其餘幾日都無乜勢，伏勝唔知點解重會有人傳話隻股會升到去6毫子。如果伏勝無睇錯嘅話，呢幾日的確係有幾個經紀牌頂住個價，不過就唔係好覺有實盤買，如果打算買呢隻股嘅朋友，千祈要醒目，如果走唔切，分分鐘被激到變「瘋瘋」。
另外一隻各位要昅實嘅股份就係中國電信（728），喺上個星期五嘅收市價1.45元，嗰日朝早由1.39元掃番上1.44元水平，非常好睇。據包銷個朋友講，話有大行不停叫啲客買呢隻股，重話敢寫包單隻股起碼有一成以上嘅回報，依伏勝嘅經驗嚟睇，隻股既然係用資產淨值嚟上市，應該下跌嘅風險唔係咁大嘅，所以伏勝都係咁意買1萬股嚟支持一下。
伏勝