當年今日
關於我們

中環在線:請飲咖啡限時限地 - 李華華

蘋果日報 2007/11/06 00:00


阿里巴巴噚日掛牌,一手勁賺萬三銀,華華抽唔中嘅同事恨到牙癢癢,跟住喺公司收到阿里巴巴個電郵,話請飲咖啡,諗住抽唔到都有杯咖啡補數,點知睇清楚,咖啡贈飲時間係噚日上晝10點到下晝4點,但個電郵下晝3點半先收到,華華唔敢質疑馬雲嘅誠意,可能係華華公司電郵系統問題啫。
不過,要去指定嘅6間PacificCoffee先有得飲,雖然都喺旺區例如中環、尖沙嘴、旺角,但中環要去威靈頓街、旺角要上新世紀廣場。請人飲咖啡請得咁刁鑽,真係多謝夾盛惠。
除咗飲咖啡,阿里巴巴下晝仲開記招見吓傳媒,晚頭喺天星碼頭搞露天Party祝捷,講開下晝嘅記招,有位洋人扮《華盛頓郵報》記者,質問馬總係咪唔容許網站有非法交易,咁咩為之非法交易?呢位洋叔叔係指賣魚翅!馬總話,佢同屋企人都唔食翅,但佢尊重中國飲食文化。所以話,有時真係唔知啲洋人點諗!