豪門新抱、林家「永遠媳婦」謝玲玲，究竟如何與Cult片拉上關係？仲揚威海外？

謝玲玲於1976年曾拍過王羽執導電影《虎鶴雙形》，02年被《神探飛機頭續集》導演史提夫（Steve Oedekerk）買入版權，用電腦加工，改名為《醬爆武林》（Kung Pow Enter The Fist），當年在美國票房有一千六百萬美元（約一億二千五百萬港元）（新聞連結： http://bit.ly/2hRFAvS ）。

謝玲玲忽然升呢做荷李活女星，戲中她被「加戲」，無厘頭解開胸圍及露背全裸性感演出。

提到突然變做荷李活女星，謝玲玲笑言知情，更在美國買了DVD，亦知道在波士頓上映過：「佢將王羽換咗一個美國演員，我都唔知叫做咩名（即導演Steve Oedekerk），其實佢哋加咗啲戲，好似我打開件衫，其實嗰個唔係我嚟，嗰個身材咁好嘅，唔係我嚟，但係其餘正面嗰啲係我嚟。」

對於被加性感戲，謝玲玲就一笑置之：「我朋友啲孫生日會就一齊睇呢齣戲，卡卡笑，嗰陣時呢套戲唔係笑片，係功夫片，虎鶴雙拳鬥邊個羸，佢加咗好多漫畫好笑嘅嘢，嗰陣時我同屋企人講笑，係唔係應該同佢哋攞番版權。」

另一齣後來變成Cult片的，是1976年拍攝、陳洪民執導的《戰神》，在香港戲名為《香港大災難》，但被網絡統稱為《關公大戰外星人》，被推舉為神級cult片，彭浩翔買下原裝孤本，正進行數碼修復。(新聞連結： http://bit.ly/2xmL2ZA )，劇情講及外星人在港九大肆破壞，連尖沙嘴鐘樓亦被連根拔起，最後要關公打救港人。謝玲玲在戲中飾演雕刻關公像的失明雕刻家女兒。

無啦啦成為cult片天后，謝玲玲笑稱，現在講起來，依然莫明奇妙，皆因她的戲份全在台灣拍，亦不知戲中故事：「拍嗰時同出街係完全唔同，我哋係唔知，做雕刻家個女，個雕刻家去雕刻個關公，嗰陣時最記得去學電單車，我到o依家都有嗰個印象，去小學學校學揸電單車，當時二十歲左右，景喺香港，其實喺台灣拍，唔係神怪片，係合成特技片，有好多特技片今時今日睇返都係天馬行空。」

當時陳洪民導演有否解釋如何拍，謝玲玲稱：「拍戲嗰陣係一段一段跳拍，淨係知自己嗰part，同埋以前比較後生啲，如果o依家再做，我會搞清楚前前後後故事。」至於修復版，謝玲玲稱：「我朋友前幾年喺網上睇過呢齣戲，畀我睇咗，到修復咗會去戲院睇番，睇番自己後生細個，都會有啲回味。」

採訪：梁錦雯
攝錄：葉君海
攝影：林德雄
場地：Beefbar

【閃耀人生女人心－謝玲玲(1)】返學有特權 婉君表妹的童星歲月
http://bit.ly/2pnLmVU