天水圍東華三院李東海小學女教師林麗棠疑不堪工作壓力，上周三（6日）於校園內墮樓身亡。東華三院主席王賢誌昨日表示，會成立獨立調查委員會調查事件，校長羅婉儀由今日起休假，由兩名副校長暫代職務。今日學校如常上課，有家長認為羅校長應該現身交代事件。

東華三院主席王賢誌，昨天曾表示一直未能與羅校長接觸。他其後在個人fb稱，昨日下午終於和校長通了一個電話，王稍後會在fb中更新狀況。

家長梁小姐的孩子是低年班學生，每星期都有圖書館活動。孩子都知道林老師離世，並對她說：「老師走咗，唔會返嚟。」

梁小姐指：「其實要發生啲咁悲慘嘅事，係好多因素，係好可惜。如果因為某啲原因而咁樣走，都係好可惜。」她指平日在學校聽校長講座，感到她對教育的熱心，「不過人有兩面，或者真係好多行政上，係佢無辦法控制。」她認為校長上任多年，自有其管理的一套：「佢會有方法，對老師的管教（管治）都係有佢嘅方法。」

梁續說：「到目前為止，佢（校長）係眾矢之的，點都要行出嚟。究竟點樣對老師，得佢知，要畀個交代。」

另一位家長魏先生的孩子讀二年級，他指間中都會見到羅校長，但他不清楚事情的具體情況，認為校長「有需要自己出嚟交代吓」，不過他對調查委員會有信心，「公平、公開、公正嘛！」更沒有想過因為今次事件而要孩子轉校。

家長周先生說：「無風唔會起浪，當然係有咁嘅問題，聽其他家長講，校長對家長嘅態度亦唔係幾好。好似話，如果有問題，校長唔係去聆聽問題，然後解決，而係叫家長自己搵科任老師或負責老師處理。」不過周先生對東華三院仍然有信心，相信東華會改善。

在附近任教的一名中學老師對林老師的離世表示惋惜，他指實則情況不清楚，不便評論；只是，事件令他感覺有人用手段，想令林老師自動辭職。

他指一般而言，終身教席「原則上無大錯係好難炒，於是要喺細微位斟酌，有冇細微嘢做錯咗，累積落去，先可以有機會炒。林老師做咗十幾年，應該係、正常係長約吧！唔知有咩手段，令佢覺得工作好困難，令佢自動辭職。」

就讀小五的黃同學表示，死者林麗棠老師為圖書科主任，主要職責為管理圖書館。他指自己去年曾短暫擔任圖書館管理員，所以經常與林老師接觸，形容林老師溫柔體貼，經常關心同學，對於她不幸離世，他與父母都感到傷心難過。他又指今日校長並無上學，暫時由副校長代為處理校務，而校方其他老師亦沒有再在同學面前提起林老師，「我班有幾個同學連埋我都好唔開心，老師發現之後，都帶咗我哋去搵社工，我哋每個同學都為林老師寫心意卡，希望喺喪禮度燒畀佢」。

另外，同樣就讀小五的王同學亦形容林老師為好老師，經常會與同學傾偈，又會主動關心同學的上課進度，對於林老師突然離世，他指班上所有同學都感到難過不捨，「今日學校冇早會，大家都如常上堂，副校曾經開咪講返學校發生咗不幸事件，至於通告就上個禮拜派咗」。

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw

全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2VKESPM

你敢爆，我敢獎！ 立即WhatsApp《蘋果》24小時爆相爆片熱線 或致電：63836568