好多嘢,政府越打壓,佢嘅聲音就越壯大。好似每年6月4日嘅維園燭光集會,又好似民間獨立音樂表演園地Hidden Agenda。轉戰觀塘同牛頭角工廠好幾年嘅Hidden Agenda,一直喺警察同消防嘅滋擾下苟延殘喘,但係佢哋嘅生命力超強,死唔斷氣之餘,最近仲衝出香港,揚名海外。
事緣Hidden Agenda今年玩自拍,將佢哋過去被打壓嘅故事製作咗一套紀錄片《Hidden Agenda》。咁啱今年8月威尼斯建築雙年展嘅香港館講到「活化工廈」嘅問題,就邀請咗Hidden Agenda將紀錄片拎去威尼斯播放。
咁都未算威,下個月《Hidden Agenda》仲會登陸日本,唔係釣魚台,而係東京同大阪。Hidden Agenda成員Kimi話,《Hidden Agenda》將會喺東京一間叫Uplink嘅書店Cafe度搞放映會。Uplink係已故日本劇作家兼電影導演生前開設嘅電影文化交流場地,到時Kimi都會出席,講述Hidden Agenda嘅血淚史。雖然呢啲放映會並唔係好似康城影展咁威威,但係Kimi話,好難得佢哋可以同世界各地經營民間音樂場所嘅同好交流。