年初，著名導演張藝謀被指超生，被當局罰款748萬元人民幣，內地超生問題即時成為焦點話題，例如內地真人騷節目《爸爸去哪兒》嘅郭濤，佢大方承認除有兒子「石頭」外，還有一個女兒。內地歌手孫楠同第一任太太買紅妹生咗一仔一女，再同第二任太太潘蔚再生個細女。

為咗解決超生呢個問題，內地星會選擇到外地生B，例如本身育有一子嘅孫儷同鄧超，噚日喺香港順利誕下囡囡。其實原來有不少內地藝人，都選擇喺香港生B，變成「雙非B」同時亦係馬上成為香港人。

姜文、周韻
同法籍前妻育有一女，同第二任太太周韻喺2006年喺內地生咗個仔，兩年後再安排太太來港生B。

田亮、葉一茜
前「跳水王子」田亮同內地藝人葉一茜喺2008年生咗田雨橙，前年年初帶太太嚟香港生次子。

文章、馬伊琍
文章同太太馬伊琍育有一女，之後有傳再安排太太來港生B。

胡軍、盧芳
胡軍同太太盧芳喺2001年生囡囡，然後喺老友劉嘉玲相助下，08年參加優才計劃變身香港人，唔再受超生限制，盧芳再度懷孕，誕下囝囝胡皓康。

其他特別例子，包括黃渤嘅太太小歐喺2011年生咗個囡，今年8月又做老竇，所以安排小歐去美國待產。內地女星楊冪同北上發展嘅劉愷威奉子成婚，婚後移居香港待產。來自台灣嘅吳佩慈，今年2月亦於香港剖腹生咗囡囡Hilary，佢準備半年後再生第二個。

內地星來港生B成風，有啲索性申請優才計劃全家變晒香港人，有網民喺討論區都議論紛紛，親子王國亦不少人留言，擔心「明星效應」之下個個有樣學樣:

「有錢嘅冇乜問題喎，佢哋一定做足產驗，晨早約好醫生同床位，唔會穿晒羊水先衝入急症室...」

「幾時香港生仔，要包埋佢哋父母嘅身份證？要方便出國就自己父母申請。係有錢，有技能，就一早申請啦，要靠個bb？雙非就係雙非。」

「有錢嗰班只係想逃避一胎政策，生女嘅咪嚟香港，生仔咪留響大陸生。」

「佢老公係北京人。呢啲咪雙非媽，生嘅係假龍女囉。拍下戲都叫明星，香港大把。湯唯都申請咗做香港市民，佢呢啲又唔知係咩。拍幾套戲，老公係監製，就唔可以喺係北京生活……」

「香港政府點解唔效法大陸！早前睇新聞，大陸農村戶喺城市生咗B，啲仔女都唔可以享有城市戶籍呀！連大陸自己都識得咁做呀！點解香港唔識學吓呀！跟阿爺做吓嘢啦！香港人就嚟被吸乾0架喇！」