歐洲債務危機困擾本港股市，牛皮待跌。過去數年來港買起不少豪宅的外資基金，班「水」回國救市，豪宅價必定大受打擊；連帶內地客亦被內地收緊水喉措施嚇窒。不同恒地李公子大把子彈，豪擲18.2億元買屋自用，新興豪宅如今開始打冷震，坐以待跌。
記得早幾年，一時話美資退休基金買起遠期住宅樓花，一時又指歐洲基金大掃西九龍豪宅，市場一面唱好以此為證，大力谷起豪宅價，搞到政府都要出聲說，豪宅價格升得好離譜，順勢推出一連串平穩樓價措施。首先修訂多年被市民詬病的不良樓花銷售手法，連消帶打，間接打壓埋樓價，仲講到明10月施政報告時，會檢討措施的成效。

歐美基金紛班水救國

最近歐元崩潰，令到好多以歐元為交易結算的基金中招，要拋售本港物業急急套現，一批奧運站二手屋苑，均見這些基金急於出貨動作。似乎歐洲各國政府未傾掂數的話，大手割價出貨的行動陸續出現。
有區內業主對老樓說，九龍站一帶屋苑近月亦少見了內地客的蹤影，交投顯著減少，可能短期內亦難回復活力，天璽個別已上會業主亦減持靚貨，蝕讓出售。
近年樓價的確由豪宅帶動，連帶刺激了中小型住宅亦炒到烽煙四起，這班基金佬大手出貨，對中型住宅打擊有多大，暫難估計，反而為一批本地大戶提供執平貨的機會。本地大戶手上資金充裕，而且隨時可拎出大筆現金，一手交錢一手交樓也無問題。
老樓記得，金融海嘯時漫畫天王馬榮成在那段時間積極睇樓，剛好碰上山頂倚巒業主劈價賣樓，一眾準買家在某個周日齊集現場睇樓，馬仔即時出價，並且一筆過現金交易，現時單位已升值起碼兩倍。
正所謂一雞死一雞鳴，有人離場亦有人入場，總之最緊要有充足彈藥，等待最佳時機，一定等到平貨現身。

劉兆昌
http://www.HKLau.com