當年今日
關於我們

人際增值:
鬼鬼祟有蠱惑8大走私蛛絲馬迹

蘋果日報 2005/05/09 00:00


一對男女最清楚對方如何看自己,不是在熱戀時,是在分手前。雖然分手時的說話不好聽,請認真記下來,那是你比較真實的一面。

摘自阿寬《男人的情慾愛》
偷食、偷情、走私、出軌、劈腿(一腳踏兩船)……任你怎形容也好,一句話,變了心!要知道情人是否有異心?不難,除非閣下遇着情場高手,否則憑對方平日的表現,絕對有蛛絲馬迹俾你見。知道了,方可作下一步打算,選擇要箍煲定了斷。

記者:尹珊珊 攝影:伍慶泉
Models:Sam(TheGroup)、Bonny
鳴謝:帝苑酒店

在心理學上,當一個人做某種連自己都覺得不太光彩、有虧於心的事情時,往往會覺得心虛和膽怯,從而設法掩飾真相,以免暴露惡行。同樣道理,一旦戀人另結新歡,無論是貪新鮮也好,感情生變也好,總之在原有的關係尚未完全破裂前,都是懷着這種鬼祟而複雜的心情。只要細心觀察對方的表現,若有出軌,絕對有迹可尋。以下的8大常見變心先兆,如果其中有四、五項同時重複出現在對方身上,小心,有第三者的可能性就好大。
empty
「走私」有樣睇
約會次數減少
由一日10個Calls,到幾日唔見人,就連放假都話要開O.T,見面又例牌遲。
empty
見面心不在焉
難得見到面,態度卻極冷淡,總是冇厘神氣,心不在焉,陪你行街重苦口苦面。
empty
密密傾神秘電話
見面期間手機響不停,然後跑到大老遠接聽,表現鬼鬼祟祟。
empty
清洗SMS紀錄
見面前先行清洗所有SMS紀錄,慌死你會Check手機,擺明是此地無銀。
empty
儀容外表唔多理
以前見面執到正,家陣打扮求求其其,有醜態都唔怕畀你見。
empty
失驚無神獻殷勤
正所謂「無事獻殷勤,非奸即盜。」某日無端端對你勁好,擺明想彌補罪惡感。
empty
關心體貼欠奉
莫講話言語上的關心,家陣望多你兩眼都懶,你想講多兩句佢都嫌煩。
empty
親密接觸頓減
男人鍾意你,就會想有親密接觸,這是千古不變的定律,對你冇反應?肯定有問題。
empty
街坊講
伴侶偷食點算?
Lam(21歲,學生)
「買條鐵鏈鎖起佢囉!(大笑)大家係成年人,梗係坐低傾,用客觀態度面對。」
empty
Arix(19歲,鋼琴伴奏)
「攤牌,如果真係有第三者,唔知點喎?我諗我淨係識喊囉!」
empty
Louisa(24歲,文員)
「重使問,佢都背叛我,梗係分手啦!(瞪眼)」
empty
專家講
攤牌必問三題
要箍煲?要了斷?正如姻美輔導中心心理輔導員黃茵女士指出,每段感情的處理方法各異,在選擇攤牌之前,不妨先考量以下3個層面:
1.自己有冇條件?
「好實際,如果年紀大條件有限,投資咗咁多青春落一段感情度,梗係唔可話放手就放手,始終感情都講現實條件。」
2.重有幾愛佢?
「問吓自己個心想點,愛唔愛佢?如果愛到死,咪惟有隻眼開、隻眼閉囉,如果本身感情唔算濃,就無謂強求!」
3.本身有冇做好?
「反省感情狀況,雙方的關係係咪有問題?自己有冇疏忽對方?若有,對佢好啲,溫柔啲,嘗試讓對方感受你的好。」