中石化（386）今個星期有幾單大消息，除咗公布首季業績之外，又突然申請H股停牌，隨後透過雷曼兄弟發行15億美元（117億港元）7年期零息可換股債券。是次是繼01年和黃（013）發行26.7億美元（208億港元）可換股債券後，亞洲區最大宗CB發行，也是國內公司金額最大宗的CB，宣布後中石化跌咗兩日，反而旗下嘅上海石化（338）同儀征（1033）走勢頗強，噚日分別升逾6%。
市場順理成章揣測中石化以零息CB集資逾百億元，係為咗私有化兩間子公司。首先，係117億港元與上石市值113億元相若，第二，係發行零息CB唔使畀貴息，符合成本效益，而且唔使配股集資，即時攤薄股東權益。
根據條款，CB以面值100%發售，並以兌換溢價上限50%定價，即兌換價約每股10.76元。倘若債券被全數兌換，中石化須發行10.87億新H股，相當於擴大後已發行H股股本6.09%。要留意嘅係若債券至2014年到期時，仍未被兌換為中石化H股，中石化將以發售價121%贖回，唔係完全無利息成本，只係睇未來7年內股價可唔可以升至兌換價以上吸引CB持有人換股。

上石同儀征講私有化講咗好多年，結果等到𠵱家都未有消息，因此，歐陽風認為，市場預期集團喺上石股價在幾年高位嘅時候提出私有化的諗法，似乎太過樂觀，同時高盛剛發表報告，建議沽售中石化，目標價睇6.36元，理由係油價高企情況下，煉油業務可能帶來虧損，既然下游煉油業務處境唔多樂觀，更加無理由要用高價去私有化呢兩間下游業務子公司。