前新聞主播周嘉儀（Venus）、導演莊文強同股評人陸羽仁，今日喺尖沙咀1010旗艦店，為新型號手機發佈會擔任嘉賓。

0依家轉做金融行業嘅周嘉儀，經常手機不離手，佢話試過3次唔見手機經驗，Venus話:「試過兩次喺洗手間，1次喺的士，自己都好驚，因為手機裏面有好多嘢，不過都係及時發現返去攞番，亦聯絡到司機攞番。」

對於現時手機資料容易外洩，Venus話都有擔心，但強調自己嘅手機唔會有親密照，佢話：「生活照就會有，唔見電話唔係淨係自己麻煩，因為有其他人電話，冇話唔見得光。」Venus透露幾個月前亦曾收到詐騙電話，佢話：「冒認中聯辦電話，我同家人都收過，不過家人好精靈唔會理。」

莊文強話拍《竊聽風雲》系列嘅時候，吩咐同事搵竊聽工具，原來喺內地1300蚊人民幣，就可以買到一次過向8個電話勾線嘅儀器，搞到拍攝時演員都好驚俾人勾線。