【如果有超能力】 楊千嬅想將老公隱形 丁子高叫佢彈開!
丁子高楊千嬅
楊千嬅同老公丁子高,今日夫妻檔現身香港迪士尼樂園,參與「迪士尼巨星嘉年華-大玩水花」,佢哋喺活動上分享為動畫電影《超人特工隊2》配音趣事,聲演超能太太嘅千嬅話,今次配音困難之處係要以聲去演超能力嘅力度,所以配音時要周身郁,好似好好打咁。首次配音嘅丁生聲演超能先生,他話最難想像係被打嘅感覺,千嬅即笑說︰「你早講,我幫你。」丁生話︰「妳用手,人哋用腳踢。」千嬅即指用腳踢吓佢。
能夠以父母角色透過電影去講道理給大家聽,佢哋覺得好有意義,講到若果為對方配上一樣超能力,丁生說︰「我會畀佢做冰條俠,當佢想雪凍嘢飲可以自己凍,最驚佢識將人瞬間轉移,怕同佢傾計時,如果唔啱聽,就唔知將我變咗去邊度。」千嬅想畀老公有隱形功能,因為老公對任何事物都有好奇心,同時又是低調高手。戲中夫婦經常嗌交,千嬅指現實生活兩人有意見不合時,但唔會大聲嘈,因為要型。丁生笑指以後嗌交時,會學超能先生裝胸作勢,千嬅好奇問自己應該點?丁生說︰「彈開。」
兩人今次接配音工作時,第一個係問仔仔Torres意見,因為Torres好鍾意第一集故事,當Torres得知父母做超人後,即問自己會做咩角色,千嬅說︰「我同佢講你太細,等你講嘢再清楚啲先,乘機叫佢學講嘢。」丁生指仔仔似戲中仔仔Dash角色,遇到唔啱聽就一支箭走開。配音時兩人分開配,千嬅因為要拍劇而先配音,之後丁生聽著千嬅啲聲去配,丁生說︰「喺戲裏面佢嘅語氣,就好似平時對住我嘅時候一樣,所以聽住佢把聲嘅時候,就好有家嘅感覺。」首次夫妻檔配音酬勞是否可觀?丁生指係開心價,但最希望係給自己一家有美好回憶。
精選娛聞,喺晒《娛果》
http://fb.com/appledailyent
阿仔Torres得知父母為動畫配音做超人,好開心。