執相執到出神入化嘅「美圖秀花」宮雪花，最近熱爆全城，前晚花姨喺大埔總台舉行嘅亞視《ATV 2014感動香港年度人物頒獎禮》，繼續爆seed，花姨搶閘同亞視主要投資者王征合照，同時個嘴唔停口噏噏，有人聽到佢唔停咁嗌「法輪功」，喺亞視叫「法輪功」？花姨都幾大膽喎！後來經過查證之後，花姨原來係叫王征「發人工」，唔怪得王征乜嘢都當聽唔到喇！

或要遲幾日出糧

日前花姨要求傳媒幫佢「美圖秀花」，前晚又要求影佢嘅畫作：「兩幅畫拍賣咗25萬，可以出糧畀幾個亞姐，不過老闆有幾十億身家。」對於通訊局唔建議續牌畀亞視，花姨硬撐：「𠵱家點樣做都感動唔到發牌嗰啲機構，亞視有進步呀，老闆都投資咗十幾億，𠵱家搵邊個肯出嚟買吖？係咪得一個TVB就夠吖？咁樣對人哋太苛刻，點都睇咗啲成績先喇。」
張家瑩性感打扮佩戴十幾卡綠寶石同鑽飾現身，佢話亞視有冇得續牌擔心都無謂，所以都係做好自己份內事，11月份糧又點先？張家瑩話：「問過（葉）家寶，佢話一定有糧出，因為月尾呢幾日橫跨周末，可能要遲幾日。」至於近期倒帶式回應不建議續牌亞視嘅高層葉家寶繼續話：「我哋對續牌非常樂觀，喺呢個紛亂時代更需要亞視。」佢仲深信好快會有結果。
撰文：馮仁昭