家陣喺香港想買樓難，想買張演唱會飛，可能更難。

從前，要買演唱會飛，俾錢、肯排隊就買到，後來用信用卡積分換飛，朝早起身連眼都未擘大，就不停打電話去專線博換飛；再演變到指定信用卡優先訂飛，銀包入面，卡嘅數量分分鐘仲多過紙幣。再到近年網上搶票，個F5掣都唔知撳爛/換咗幾多個……

原來，低處未算低。

商台噚日喺官方facebook專頁宣佈喺11月7日假灣仔會展舉行嘅「拉闊音樂會2018 麥浚龍 謝安琪 王雙駿 陳哲廬」，一眾樂迷，無論係邊一路人馬，梗係着緊搶飛啦！

據個post寫，想睇Juno x Kay，只要喺10月5日中午12時起，成功登記Join「881903.com」做會員，並啟用戶口嘅全新會員、訂購「指定節目重溫計劃」，即可獲贈今次拉闊音樂會門票兩張，仲寫明「毋須抽籤，成功訂購保證有飛」，不過就「數量有限，額滿即止」，即全部門票送出後，優惠活動亦會終止。

唔使擔心，到時新join會員係無法訂購「指定節目重溫服務計劃」；而成功訂購到嘅就代表得獎，毋須抽籤。而且，於此指定服務計劃屆滿後，電腦系統係唔會自動幫你續訂，放心。

咁乜嘢係訂購「指定節目重溫服務計劃」呢？

有兩個plan：
計劃A：港幣$1,080 - 節目重溫兩年服務計劃（365天 x 2）即送地面座位門票兩張
計劃B：港幣$720 - 節目重溫兩年服務計劃（365天 x 2）即送看台座位門票兩張

留意埋以下條款（節錄部份）
．所有登記戶口不可轉移或與其他戶口合併
．座位編排由主辦機構決定，得獎者不得異議。

問題來了。

要搶飛除咗要附出$1,080（送地面座位門票兩張）/$720（送看台座位門票兩張）外，仲要係全新登記，換句話講，現有會員統統冇份換飛，有錢都唔俾你買plan攞飛。

無論買邊個plan，除番開每張飛都只係540/360，仲要係好少開騷嘅Juno加Kay，表面上真係抵到爛，不過，只顧招徠新客，擴大個database，而冇理班忠心支持嘅舊有客仔，似乎有點講唔過去。

難怪一眾會員喺個post下留言鬧爆，佢哋分別話：
「十三年舊會員表示想哭」
「支持十多年的舊會員表示失落」
「做成10年舊會員咩優惠都冇，商台好嘢」
「舊會員真係好慘，支持咁耐唔好講優惠，連參加資格都冇。間接幫黃牛做生意。」
「又懲罰舊會員」
「十幾年舊會員年中被迫加價用新Plan不特止，仲要前幾日續返會乜＿都冇……彈App都已經唔同你計。」
「舊會員自動續會咗幾年，連資格/機會都冇，可唔可以正視一下。」
「如果而家你地咁樣玩，每次想要拉闊飛都要開個新account，咁我一年要開幾多個？定係舊會員已經畀晒錢，退唔到會籍啦所以唔使理？」

嬲豬之聲不絕於耳。

雖然有網民突破盲腸，話「商業電台就是商業」，但係，錢唔是一定要咁賺的……

精選娛聞，喺晒《娛果》
http://fb.com/appledailyent