身為駕駛人士唔止揸車要有好習慣，其實泊車都要o架！如果唔係就會好似黎芷珊咁！

今日有網民喺fb群組「香港違泊全紀錄」開post鬧爆一位Benz車主，事關呢位車主將車違泊咗喺中環威靈頓街鏞記門口，而咁啱德己立街轉入威靈頓街呢個街口非常之咁窄，而有巴士因為呢架Benz頂住而轉唔到彎，網民仲話警察嘗試聯絡車主，但對方唔聽電話，最後巴士要喺警察指揮交通下先可以退後轉到彎開車走，幾分鐘後車主終於現身，網民仲影到佢就係黎芷珊。

黎芷珊今日接受傳媒電話訪問，佢不停講對唔住要同所有受影響人士道歉。芷珊話:「真係非常抱歉、好對唔住、唔好意思，我好認真咁同所有人講超對唔住，係我唔啱，我唔應該喺嗰度違例泊車。」問佢點解要違例泊車？芷珊話:「今日下晝我趕住開工，點知塞車塞咗4、5個字，嗰一帶啲停車場又爆晒冇位，由於我已經塞到遲咗，當時個心好慌，所以情急之下就泊咗架車喺嗰度，完全冇為意嗰個位會影響到巴士轉彎，令到咁多人受阻，我真係好抱歉。我知道趕時間唔係藉口，所以今次絕對係我錯，係我唔啱。」

不過，芷珊話個網民對佢有啲誤會，事關警察打俾佢嗰陣，佢係有接聽電話，唔係網民所講冇聽電話，而佢一收電話之後即刻走番去現場，大慨泊咗5至10分鐘左右，而佢落到嚟之後因為要等警察抄牌，所以唔能夠即刻開車走，並唔係網民所講施施然若無其事，佢仲話:「引起大家不便，我真係好抱歉，我以後絕對唔會咁做，以後唔會再有呢啲事發生。」晚上，芷珊再喺fb留言向大家致歉，真係好有誠意。