兩位香港左手將組成嘅混雙拍檔鄧俊文／謝影雪，噚日各自同另一半經歷難忘嘅神奇之旅！繼上月底爆冷殺入紅館香港公開賽四強後，噚日又成功晉身塔石體育館舉行嘅澳門公開賽決賽，雖然最後以0:2不敵中國組合張楠／李茵暉，但屈居亞軍嘅佢哋講明，下個目標係盡快躋身世界排名前20位內。

目標躋身世界排名前20

「文雪配」五月底才開始合作，上月香港站爆冷奪銅，世界排名由71位升至51位，今次澳門站屬低一級別嘅「格蘭披治黃金大獎賽」，但亦吸引唔少海外選手參加，「文雪配」連贏印尼、中華台北、香港及大馬組合晉級決賽，對住張楠／李茵暉原先有好開始，可惜後段過急，最後喺47分鐘比賽以19:21、15:21落敗，繼10月泰國站後再次奪黃金大獎賽亞軍，獲大約35,000港元獎金。俊文賽後將大會送嘅鮮花轉送隊友兼女友吳詠瑢，阿雪都唔輸蝕，因為亦有男友朝早趕船到澳門捧自己場。
一年前同一地方經歷女雙拍檔潘樂恩受傷嘅阿雪話：「呢幾日喺體育館都見到唔少人喺場上滑倒，好彩今年一切順利。」阿雪同俊文期望明年盡快殺入世界排名前20位，繼續為港爭光。