內地嘅財經資訊非常流通，但係經常都有好多所謂秘聞嘅消息爆出嚟，孰真孰假？讀者要自己判斷喇！華華噚日上網睇內地《每周文摘》轉載一篇嚟自《商界》嘅文章，呢篇文章以「李嘉誠與兩個女人的愛情」為題，淨睇條題就夠「搶」！文章上半截講超人已辭世的髮妻無乜特別，下半截講周凱旋就相當有「至死不渝」feel！
作者話，超人喪妻時60出頭，「身體硬朗，精神奕奕，又是富豪，所以不乏主動示愛的美女……但始終如一塊白璧，港人都知道李嘉誠和莊月明情深似海……」。1993年8月，超人同周小姐結緣於北京王府井重建項目，雙方只用咗唔使30分鐘傾妥公事。歲月如梭，兩人後來有個共同心願：「此生不僅做情人，而要做相依相偎的夫妻」!
超人去年中秋夜向兒子表心迹：「我經已77歲，周凱旋也44歲了，我們的婚姻也不應該拖到永遠……」但兩個少爺仔無反應。後來12月3日周小姐生日，大少同二少居然畀個驚喜佢，幫周凱旋搞咗個生日會，周凱旋同超人仲開心到喊。講到呢度，作者寫嘅嘢雖然違反咗一般香港人嘅理解，但華華都駁唔到。
結尾話，超人與周小姐決意不再隱瞞戀情，晌06年8月27日，兩人第一次晌公開場合親蜜亮相，同時仲接受咗媒體訪問。嗱！嗱！嗱！8月27日所謂合照其實係華華樓上《壹週刊》嘅封面登咗兩人意大利十指緊扣嘅相，至於所謂訪問，華華同埋壹仔嘅同事都想。