十幾個月下來，鬍鬚曾在角力中已節節敗退，佢代表一套傳統政務官核心管治價值輸俾民粹政客，其中一個關鍵係政務司司長林鄭月娥，與梁合作一齊奪權。佢手執扶貧大政策，聯合何喜華、羅致光等人，越過政務官，利用關愛基金狂派，一年半載後再由公共開支吸納。林鄭與梁振英二人各自為了自己政治利益而另立山頭，變成民粹政客，繞過政務官及財政管理系統，奪取決策權，行政主導實際上已分崩析離。今年由林鄭負責掛帥草擬之施政報告，以扶貧為重點，將額外經常開支谷大200億，換來一個月只升四點民望。而梁打擊樓市，用辣招後果就令印花稅及賣地收益減少。掌聲由兩人去領，由此而引伸之財政後果，削減一次過紓困措施，如減甜措施；包括公屋免租、綜援出雙糧及退電費，肯定俾基層及政黨媽叉，就由鬍鬚曾去承受，對梁及林鄭二人而言，一切好圓滿好順利。
梁振英終極目標是逼財政司同意，打開金庫動用盈餘投資內地，商界及財金系官員知悉梁要去南沙買地，搞「內交」如果冇帶來投資項目，廣東省朱小丹、胡春華會睬你梁振英？儍的嗎！而林鄭就簡單得多，用派福利攞民望，一切「以我為主」，兩人聯手，加上梁粉外圍如陳啟宗、羅康瑞、林奮強等不斷攻擊，鬍鬚曾政治前景可謂十分黯淡，頂得一日得一日。
曾俊華眼前只有一途，佢應考慮留低一個甚麼legacy？在今年預算案中總結公共財政管理核心價值及政務官信念，至少留低一個說法，未來幾年民粹政客當道，經常開支肯定越滾越大，大勢所趨，佢現實上阻止不了，作攔路虎後果，係梁振英會用政治手段逼其下台。至於另一招成立基金，將盈餘撥備，先一步鎖死部份用途，以備有朝一日梁振英內地投資大計起動，加上梁與林鄭兩人合作，燒銀紙快過燒衣紙。財政司做好呢兩瓣，當作有個交代。
今日邪門當道，歪風四起，官場實已不可為！
添馬男