近年落後於整體政治形勢、立法會一席不保嘅民協，近日又有新搞作，由32歲嘅深水埗區議員楊彧拍短片上載到Facebook，介紹荔枝角填海區一帶嘅未來發展，巨細無遺，似乎民協唔再由馮檢基擔綱，畀人耳目一新嘅年輕感覺。

楊彧喺片中有乜好介紹？原來係透過航拍，帶大家飛上天空，以高空鏡頭介紹荔枝角海傍日後點樣翻天覆地，區內將有一所輕度智障特殊學校，臨海兩幅地皮將拍賣，一幅做酒店，一幅做私人住宅，楊彧預料兩幅都會係九龍新地王。提供1300個單位嘅公屋海盈邨明年中將會落成，旁邊亦有5幢居屋，提供2500個單位，預計2019年落成。

楊彧仲預告，臨海地皮嘅中心、即係六號地盤，會有區內期待已久嘅公共設施，屆時亦有行人天橋駁通私樓、公屋同港鐵南昌站，等大家唔使日曬雨淋。

短片： https://www.facebook.com/hoilai.yuk/videos/1581583331915161/