多得Foxy，令香港網民可以更加了解警隊嘅具體運作，好過睇《警訊》之餘，仲可以等大家昅實警察有冇濫權。八方透過Foxy，又搵到份疑似「警員面對傳媒講義」，裏面提及警察面對傳媒嘅注意事項。根據呢份應該係畀初級警務人員學習嘅教材，八方發現上至一哥特警成、下至天水圍一名散仔，佢哋對待傳媒嘅表現都仲有唔少改善空間。既然係咁，八方不妨喺度同佢哋溫故知新一下。
根據呢份教材所講，警隊需要市民支持，市民會因為傳媒嘅報道，影響佢哋對警隊嘅印象，所以警察應同傳媒建立良好工作關係。講義提醒啲警察，接受傳媒訪問時，首先要諗諗自己係咪「經已掌握事件基本資料」？
喺呢方面八方見過唔少反面教材。好似助理警務處長黃福全咁，今年2月佢開記者會講藝人淫照案，就「好大膽」咁話已經搵到源頭，仲話科技罪案組得19人。點知事隔唔夠24小時，「奇拿」就再發新相；冇耐又有網民check完立法會文件後，踢爆科技罪案組編制原來有60人。

要互相尊重唔好卸責

份教材又提到警察接受訪問時，唔應該「輕率把責任推在傳媒身上」。我哋又不妨睇吓一哥特警成，上月接受中大學生製作嘅刊物《大學線》專訪時嘅一番說話。特警成講及淫照事件中網民批評「警字兩個口」時，竟然連消帶打咁話：「警字兩個口？其實邊係，傳媒個媒字就有三個口。」八方先唔討論特警成有冇讀寫障礙，就憑佢呢種委過傳媒嘅態度，足以證明佢要返學堂再培訓。
仲有，原來學堂有教啲警察同傳媒要互相尊重。但上個月25號，八方有同事去天水圍採訪，現場竟然有個散仔發惡兇記者，要求記者出示身份證，又問記者「話事人係邊個？」唔知呢啲係咪叫做互相尊重呢？
份教材亦有教授警察答問題技巧，話警察唔應該用「無可奉告」、「無可置評」呢等字眼，應該解釋唔願意答嘅原因，例如改用「事件正在調查中」咁。唔怪得特警成3月初再次開腔講淫照案進度時，不停重複話「我哋查緊、查緊」啦。

mailto:[email protected]

警隊「面對傳媒」講義內容及反面教材

注意事項：你是否已掌握事件基本資料？
反面教材：助理處長黃福全今年2月話搵到藝人淫照源頭，結果冇耐「奇拿」再發新相

注意事項：不要輕率把責任推在傳媒身上
反面教材：一哥特警成就淫照事件亂咁釋法令網民嘩然。但佢上個月接受大學生訪問時仲死拗話「傳媒三個口」

注意事項：對傳媒要互相尊重
反面教材：上月25日一名警員喺天水圍一活動突然發惡，要求記者出示身份證，又問記者「話事人係邊個？」

特別鳴謝：Foxy軟件、《蘋果》資料室