上回講到陳志雲大爆無綫幕後故事，當中原來當年佢係唔支持林峯攞亞太區最受歡迎男歌星獎。講開電視台搞嘅比賽，原來志雲喺多年前曾經提出過搞一個歌手比拼歌藝嘅比賽，當年內地重未出現《我是歌手》呢類節目。志雲話:「好多年我喺TVB都提出過，有個構思，可唔可以搵一啲現職歌手有個比賽呢？但冇人有興趣，因為個運作模式唔同吖嘛，你唔會當係邀請佢嚟做一個演出吖嘛，差唔多係無酬金演出咁滯，人哋當然冇興趣啦，但o依家呢個構思喺內地做得好好呀，人哋請你去演出，一個工作，咁咪做到囉，我相信好多嘢變通咗都係可以有個生存空間。」

「當時有同事提出：『點得架，人哋唔肯o架喎，人哋已經係一位歌星嚟，你重叫人比賽？』如果你無酬，人哋未必有興趣，你係一個有酬嘅演出，再加上成個中國市場，人哋咪有興趣囉。今日觀眾點流失，TVB仍然係最多人睇嘅電視台，你唔需要有獨家，人哋如果有需要曝光，佢都會願意嚟，o依家好多唔嚟，因為佢去咗內地，內地市場好大，又比到一個合理嘅回報，又可以接觸到咁多觀眾，所以香港嘅電視台唔係無得做，譬如你開放模式、開放電視文化，可以同更多電視台合作，亦唔好每一次諗住無酬嘅演出，呢個唔係唔可以做。亦都要放開以往一啲執着，譬如o依家好弊嘅就係冇一個好有效嘅競爭，如果無咗競爭係冇咗個話題，特別對TVB嚟講，唔係一件好事。」

志雲話當年亞視係無綫競爭對手，雙方每一分鐘收視成績都會睇實，佢話:「你要睇住佢做啲乜嘢，逐分鐘收視睇，你o依家同邊個睇呢？大家好似冇咗個競爭，你都唔需要投資咁多啦，你投資多啲又咁多人睇，投資少啲又係咁多人睇。」佢話因為當年有競爭對手，無綫好肯投放好多資源搞大製作，例如亞視出咗《還珠格格》，無綫即刻搵另外一啲重本製作去迎戰，又例如亞視有《今日睇真D》，無綫都要製作《城市追擊》投入去競爭，有競爭先至有進步，有刺激先至會更加進取。

就連兩台晚間新聞內容編排次序，原來都有得鬥。志雲話:「以往我哋真係逐分鐘研究，點解人哋會轉咗去亞視睇《今日睇真D》，唔係睇《城市追擊》嘅？點解ATV 6點新聞話6點半完，但原來佢唔係6點半完，佢排新聞都唔同，佢最吸引嘅新聞未必排最頭，我哋亦會檢視番6點半新聞之前做嘅宣傳，話陣間有乜新聞，你係咪幫緊隔籬台宣傳？你都要睇o架喎，因為你講完呢條新聞你未做，要6點半至有，點解你6點半新聞，ATV嗰啲觀眾咪轉晒過嚟嘅？發覺原來佢唔係6點半完，佢係唔經唔覺過咗6點半，呢個雙方喺策略上都要研究，但冇一個有效競爭時你咪唔會咁做囉。」

以前香港人睇TVB係生活習慣，但o依家年輕一輩講話睇TVB會藐會話老土，問志雲認唔認同時，佢話:「我認同，因為我有接觸到年輕人，我有啲同事嘅朋友都會，但其實可能佢哋都有睇，跟住佢又會講得出TVB啲劇集劇情，可能年輕朋友喜歡前衛啲或者係反建制一啲，TVB係建制一部份，自然個情緒係比較挑戰性啲囉，有啲咁嘅心態一啲都唔出奇，我認同係有啲咁嘅睇法。」

雖然電視台要生存好難，但志雲覺得免費電視仍然有生存空間，可以試多啲新嘅嘢去捉緊啲年青人，用佢哋喜好嚟做一啲節目，亦即係最緊要有創意。志雲認為若然香港政府能夠幫電視台打通埋華南同珠江三角地方，令電視台增加收益，觀眾市場大咗，電視台投入去製作嘅資源亦自然愈多。