香港疫情嚴重失控，數周內單日確診病例由零跳到三位數字，朋友設身處地為獨守巴黎的基伯擔憂，問嗰邊情況點，想了一想答：「前總統出回憶錄，簽書會戴口罩打出個鼻，咁囉。」勿以為我得閒過頭天馬行空作古仔，法國人對口罩的認知真的普遍接近幼稚園程度，縱使不戴不戴還須戴，方法之亂點鴛鴦，唯物主義信徒看見特別心痛 ──戴咗等於冇戴，不如乾脆慳番，起碼比較環保。譬如前兩日幫襯街角家樂福，有個青年進門前停下打開背囊抽出口罩，站在他後面的我自動自發等他完成動作才跟進，暗暗讚許乖仔奉公守法，誰不知他戴是戴了，卻戴在下巴，嘴和鼻依舊光禿禿暴露在空氣中，個腦究竟點諗，真係考起。這兩天網上瘋傳兩張倫敦鬧市拍得的性感肉照，有個除晒衫褲嘅靚佬周身上下只戴口罩一枚漫步牛津路，位置同樣錯誤，春光將洩未洩，男色愛好者口水氾濫，恨不得學嗰個癲婆尖叫「戴咗都要除番落嚟」。

換了心地善良的再世菩薩，或者會普施甘露，救人一命勝造七級浮屠，義務指導這些迷途羔羊正確口罩使用方式，解釋蒙面的真正意義，怯弱兼夾胸無大志如我，當然不敢輕舉妄動。巴黎第五區雖然相對文明，迄今未聞公然「掃黃」個案，但潛伏怨氣的爆炸力不可低估，萬一口罩解說員尚未啟動PowerPoint，對方便杏眼圓睜怒吼「使乜你教啊？躝返去武漢啦」，豈不是自討沒趣？更甚者，模仿梅惠絲拋個媚眼親切探問，「閣下係開心見到我，抑或褲襠收埋把槍哩」，答案竟然是後者，就更不堪設想了。