衞生署自上月19日起，租用青衣華逸酒店作為等候檢測結果中心，原意是避免入境人士將病毒帶入社區。不過，《蘋果》接獲多名住客投訴，指酒店衞生惡劣，臉盆有臭氣上湧、企缸疑倒灌污水、所有去水位淤塞等；有專家指，沖廁時臉盆有臭氣，可能是糞渠氣喉有問題，企缸倒灌或反映上層糞渠污水流入下層單位，擔心檢疫酒店成病毒傳播點，建議住客若進入酒店房已聞到臭味，又或沖廁時聞到臉盆及企缸有臭氣或氣泡湧出，須立即換房。衞生署表示十分重視事件，會督促酒店跟進。

現時經機場入境者，若即日未取得病毒檢測結果，須乘當局安排的專車到華逸酒店留宿一晚。港人黃先生上月中返港，因航班抵港時已是晚上，需入住華逸酒店等候病毒檢測結果。黃指，酒店衞生環境極為惡劣，地面濕滑、床鋪潮濕，電水煲亦滿佈污迹，最嚴重是廁所、企缸及臉盆都有淤塞情況，「所有下水道都塞晒」；每次沖廁，已淤塞的洗臉盆「都有臭嘅氣體喺臉盆度湧上嚟」；翌日早上，企缸竟有污迹及廁紙碎殘留，懷疑廁水曾倒灌企缸。

黃質疑酒店喉管設計有問題，不明為何能作為檢疫酒店，亦擔心住客入住會造成交叉感染，「佢揀（檢疫酒店）嘅時候，有冇睇過佢衞生情況？」直指衞生署有責任持續監察酒店的衞生狀況。

另一名巿民黃小姐的外籍男友上月初自澳洲抵港，同樣須到華逸酒店等候檢測結果。黃引述男友指，酒店衞生狀況「horrible（恐怖）」，企缸有不明痰狀物體，牆身滿佈灰塵，男友欲以房間電話致電前台要求換房，「點知個電話都俾人掹走咗嗰插蘇、掹晒啲電話線」。

其男友最後以手機成功聯絡酒店換房，「但係仍然好污糟，成個馬桶都係黃色嘅，沖廁水都係黃色嘅，沖兩次啲水就浸上嚟」。黃的男友事後曾與其他入住的外籍人士交流，得知有人甚至在房內見到老鼠，批評酒店「真係冇人執過房」，若有人不幸「中招」，其後入住同一房間的住客亦有機會受感染。

香港持牌水喉匠總會主席莫鈞雄指出，若沖廁時，臉盆及企缸有臭氣上湧，又或企缸及臉盆已有一定水位，沖廁時看到有氣泡從臉盆及企缸冒出，均反映氣喉接駁有問題，甚至沒有安裝氣喉，令糞渠臭氣入屋。他解釋，廁所的U形渠需接駁氣喉，以平衡糞渠內的氣壓，否則會出現虹吸效應，令糞渠臭氣經企缸或臉盆喉管的去水位入屋。

莫補充，上下樓層單位會使用同一柱糞渠，涉及約20個樓層，青衣長康邨便影響同座向上下樓層單位，至於左右兩邊單位是否亦共用同一糞渠，則視乎該物業的喉管設計而定。

對於有住客指出，企缸翌日出現污迹及廁紙碎，他認同污水倒流企缸的機會極大，估計是喉管接駁有問題，譬如調轉了接駁配件，導致上層糞渠污水有機會流入下層單位，「應該係做過裝修改咗啲嘢，可能貪方便，有啲師傅求其去到水就得啦咁」，亦不排除因多個喉管淤塞嚴重，「得你嗰個冇塞嘅，咁咪喺你單位湧出嚟囉」。

曾視察長康邨喉管的莫又指，雖然上述情況不及排氣管播毒的長康邨嚴重，但仍有機會傳播病毒，「長康邨係條氣喉甩咗」，提醒住客若進入酒店房已聞到臭味，又或沖廁時聞到臉盆及企缸有臭氣或氣泡湧出，須立即換房，「即係有臭氣入咗呢個單位囉，如果上下左右（房間）有（武漢）肺炎呢啲嘢，佢中招嘅機會會大啲囉」，若無法換房，則要盡量少用廁所，並關上廁所門，避免臭氣入屋。

感染及傳染病專科醫生林緯遜表示，病毒可經糞便傳播，若喉管設計或保養上有缺陷，住客亦已聞到有臭氣，「有機會喺一啲霧化咗嘅污水含病毒，呢個理論上係可能發生」。有關酒店雖非標準的確診隔離地方，但他指作為檢疫設施，若上述情況屬實，「情況唔係咁理想」，不排除病毒會經霧化的污水，流入室內感染他人，情況有如當年沙士時的淘大花園及今年的青衣長康邨。

當區區議員郭子健亦接獲酒店住客投訴，指該處衞生欠佳，譬如去水位有血迹及堆滿頭髮，廁所亦聞到臭氣等，估計因酒店要接待住宿一晚的抵港人士，每日流量極大，上批住客最遲下午2時離開，下一批客最早於下午4時已抵達，「係唔夠時間執房」，亦曾一晚要接待800至900人，人手上或難以應付。

華逸酒店位於藍澄灣旁，極接近民居，郭一直反對用作等候檢測結果中心，「喺區議會講過，我哋都去信食衞局、衞生署講過呢個情況，冇回覆、冇回應」。他亦批評衞生署缺乏監管，曾發現有抵港人士在酒店附近吸煙，但通報衞生署亦未見改善，現時酒店喉管或有問題，更擔心影響附近居民。

衞生署回覆指，青衣華逸酒店經過公開招標程序，在各方面均達到合約要求，包括整體設施、房間數目，以及感染控制的要求，故獲為期4個月的合約，署方已為酒店職員提供感染控制培訓。該署表示，十分重視有關投訴和意見，會督促酒店跟進並密切監察情況。

本報已就上述情況向華逸酒店查詢，正待回覆。

若你有涉及公眾利益、權貴濫權等資料，請以Signal / Telegram / WhatsApp / Line或電郵方式聯絡《蘋果》調查組，我們有專人處理及跟進，內容絕對保密。

Signal / Telegram / WhatsApp / Line：6829 6520

電郵： [email protected]

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！