八方聽聞自從上次政改蝦碌後,發叔心情都唔多舒服,而上周趕返立法會時已經抱恙嘅佢,身體狀況依然麻麻,政改後都繼續休息,減少咗好多活動。
大家又唔好忘記喎,鄉下人唔慣夜蒲囉,發叔講㗎!盛傳2008年田北俊喺新界東立法會選舉爭冧莊,夜晚8點幾發現唔夠飛,打畀發叔希望呼籲鄉事派過票救亡,點知發叔話太遲,因為鄉紳慣咗早瞓。嗱,小明呢餐夜茶9點半先開始,鄉事mode嘅發叔,更加大條道理no show,所以建制派今次可以放心,唔使「等埋發叔」都可以同小明一齊剝花生,如果有埋蝦碌做小食,當然會更加應景。
發叔唔去,其他「主角」又到唔到?八方聽聞一如政改投票,西環希望今次活動越齊腳越好,所以將原定嘅晚飯改為夜茶,希望遷就到最多人。八方當然最想睇,互轟過嘅田大少同二少,以及互相指摘過嘅建制派再同枱,到底會唔會反枱?
李八方
mailto:
[email protected]