麥浚龍（Juno）今日去到商台宣傳新碟，最近佢忙於宣傳其首次執導嘅電影《殭屍》，佢話電影上映4日已經有500幾萬票房，所以佢打算下星期舉行慶功宴，Juno話：「有呢個票房都幾開心，即係代表殭屍片其實仲有市場，當初拍嘅時候都好有壓力，依家有咁成績都好滿意。」

Juno又話有唔少電影商都提議佢拍續集，佢坦言：「我自己就唔係好相信續集，所以應該唔會再拍，但殭屍呢個題材係有得發揮，希望有其他導演可以拍，依家我就寫緊個犯罪片劇本，希望明年可以開拍。」

忙於電影但Juno都不忘做唱片，如此忙碌，咪冇時間拍拖？Juno直言：「冇o架，套戲仲要去參加影展。」提議佢帶埋女朋友去影展？佢話參與影展冇想像中舒服，所以唔會帶好友同行。