現年41歲嘅韓劇《巴黎戀人》女星金晶恩，去年4月下嫁拍拖3年嘅圈外男友，婚後嘅金晶恩生活好寫意，名正言順做闊太。佢之前曾自爆婚後要喺首爾同香港兩地生活，又指希望可以造人成功，直認有生B大計。

而現時做幸福人妻嘅金晶恩不時喺Instagram上晒幸福，近日佢又飛咗來香港陪老公，當中佢入住中環四季酒店，頻頻晒美食照，見佢生活認真寫意，有遊覽香港，仲好健康咁去行龍脊，似乎香港天氣太熱，金晶恩都唔怕太性感，僅着黑色吊帶背心行山，非常養眼。

同時佢見好太陽時，又會去泳池曬太陽，名副其實嘅闊太生活，不過見佢仲有飲香檳，唔知會唔會影響佢造人大計呢？