《南華早報》同唔再永恒嘅亞洲電視，終於齊名咯！亞視錯報過前國家主席江澤民死訊，《南早》噚日則報道現任國家主席習近平「died last year」。嘩，食咗豹子膽呀？洩露國家機密？難怪有網民話已經入主《南早》嘅阿里巴巴馬雲，今次犯咗天條大鑊鳥。

報道原想講歷來已故中國領導人擁有足夠個人權力，讓軍區指揮聽命，但習近平嘅前任江澤民同胡錦濤卻無法應對，胡更被兩名副手郭伯雄、徐才厚架空。最後一句原本講郭、徐下場：郭面對貪污指控，徐則在一年前逝世，點知卻將徐（Xu）誤寫作習（Xi）。雖然網上版昨早10點24分更正，但網民已瘋傳出錯報章截圖。
咁啱《南早》同日頭版刊登馬雲專訪，講述收購該報原因同未來方向，仲強調不干涉編採決定、畀讀者客觀得知中國情況。有網民陰謀論話，唔通𠵱家嘅習大大只不過係替身，呢個先係真實情況？馬雲咁爆料法好大膽吓喎！

取消校對　外籍編輯工作量大

八方打探過，相信各界諗多咗。據聞呢次係手民之誤，寫稿記者原文冇提及徐才厚（Xu）下場，外籍編輯為咗提供更全面資訊，好心做壞事想加句「while Xu died last year」（徐去年已死），殊不知變咗「Xi」。消息話外籍編輯工作量好大，報館早年取消校對，所以好易出錯。
據知公司內部已作檢討。由於馬雲剛入主《南早》，呢次出錯字眼又比較敏感，希望外界唔好亂估。本報曾致電《南早》向總編輯譚衛兒同公司發言人了解情況，截稿前未回覆。ATV錯報江澤民死訊嗰次，當時身為亞視新聞部高層嘅譚衛兒因此辭職，估唔到連中兩元喎！

李八方
mailto:[email protected]