當年今日

股壇瀏覽器:匯控累積空倉大

蘋果日報 2002/08/07 00:00


港股噚日再創今年新低,恒指低見9632,最多跌230點,收9700。大市主要靠滙控(005)及恒生(011)頂住,但大家都知滙控累積頗大空倉,幾乎係數以10億元計,雖然滙控業績叫做唔錯,但仍俾大摩調低目標價,最大鑊重係大摩認為香港經濟會進一步變壞。睇個勢大戶準備力壓滙控,就算歐美股市噚日反彈,相信港股後市都係橫行。

歐資傳沽國泰
國泰(293)公布業績前遭歐資力沽,全日跌7%,收10.70元,成交達9900萬元,為近期罕見。市場對國泰中期業績預測意見頗為分歧,盈利由4.62-12.23億元不等,但以5至6億元為主,其實都叫做唔錯。
i師傅話國泰大跌,據聞因有歐資芬佬套現應付贖回。家陣投資者對全球經濟前景悲觀,資金開始流向債券市場,而且以美國國庫債券為主,相信未見到經濟現曙光前都唔會調資到股市。
比亞迪(1211)上市後股價表現理想,但始終未能吸引散戶大舉接貨,大戶開始愈買愈多,其中TheCapitalGroup已增持H股至逾10.26%,但股價表現卻開始偏軟。不過,CapitalGroup呢類基金一向都好長情,唔會咁快就散貨。
榮盛科技(1166)又搞大合併,100股合為1股。e莉莎話,傳聞合股只為方便大戶搞次震倉,由於股價已經跌至剩番1仙,冇法再壓價,因而將股份合併,以100股合併為1股計,1仙股份合併成1蚊,將有大把下跌空間,到時真係想點震倉都得。當然震倉後重會嚟多招配股,攤薄小股東權益。
阿虎