第10屆勁歌王金曲金榜年度音樂盛典噚晚喺廣州體育館舉行，周柏豪與許志安同奪三獎，而吳若希唱到越南嘅《越難越愛》喺廣州一樣奪得我最喜愛歌曲大獎同粵語金曲兩獎。

吳若希事後接受訪問，就講返早前報道話佢曾經為情自殺，佢話:「件事係N年前，當時小腹生水瘤，把聲又有事，係有情緒病嘅時候，不過對當時嘅記憶已經好淡。當時食咗十幾粒安眠藥，但係瞓咗幾個鐘就自己醒返。」

佢繼續話:「唔係為情，多謝大家關心」。問佢有冇同據傳年紀相差一大截嘅緋聞王姓男友聯絡，佢就話:「經過共同朋友講過聲唔好意思，有機會想請佢食返餐飯。」佢又話近日報道將追求者嚇走晒，以後自己會低調啲以免得罪人喎。

至於泳兒得香港傑出青年歌手獎，一身低胸到場嘅佢表示:「冇諗過今日會轉涼，心口好凍。其實近日排練新歌嘅舞，習慣著sexy同高踭鞋。新歌舞姿都幾誘惑，男友睇過video批准咗。」