一味窩輪:中企Call輪遲啲可博

蘋果日報 2004/02/02 08:00


內地禽流感疫情惡化,爆發疫症嘅地區愈來愈多,加上廣州又有沙士新個案,睇嚟港股今日都唔會太叻,尤其是國企股,繼續調整嘅機會唔細。
睇淡國企股而想揸中企(國企)Put輪,冇乜好選擇,因為現役中企Put輪溢價普遍偏高,全部都十幾廿個%,但槓桿率則不大,多數係個位數字,而且近半得5倍或樓下,單睇數據,實在唔得吸引。
禽流感係得人驚,但暫時對經濟嘅影響似乎心理大於實質(他日證實可以人傳人則另當別論),國企再調整多陣,重拾升勢或反彈嘅機會好大。自舊年4月中至今,國企指數試過兩次跌穿50日線,但隨後即開展新升浪,𠵱家50日線喺4439,博歷史重演,可候國指稍為跌穿50日線買中企Call輪,對象係9317,現價48仙,5月尾到期,負溢價0.12%,槓桿率5倍。

上實輪9577嫌貴
國企近期唔多好,個別紅籌則幾靚。上海實業(363)上周五就逆市升2.5%,收20.40元,帶起3件上實Call輪,升幅最大係9577,彈跳15%。9577玩到8月中,溢價成13%,槓桿率7倍,稍嫌貴咗啲。唔想畀咁高溢價,可揀9258,7月尾到期,溢價1.4%,槓桿率3.5倍。
章 盛