李克勤噚晚喺中環出席回歸慶祝活動，由於佢今晚要喺會展同小提琴家姚珏合演俾國家領導人睇，所以噚晚喺活動前後都要去會場綵排，雖然出入都要安檢，保母車又唔可以停喺門口直接上落，克勤話大概一個鐘入到場，但係佢都明白情況，因為有高官來到，佢仲話相信正式表演時會緊張。

克勤噚晚表演時，見到台下有觀眾蹲地影相，好心邀請對方上台合照，點知此話一出，幾十人衝上台，搞到現場有小小騷動，要停音樂一陣，等啲觀眾落台先再可以唱。之後克勤又落台握手，搞到啲工作人員個個鬼咁緊張，反而克勤就安撫大家自己無事。

事後問克勤有冇後悔講錯說話，佢話：「冇嘢，只係少少措手不及，佢哋都應該係街坊。」混亂間唔知有冇被抽水？佢笑笑口話：「未到呢個階段，我都冇水抽啦﹗」將會喺紅館開個唱嘅克勤，承認一身飛債，暫時開7場，有望再加：「o依家480元票價飛都冇晒，應該可再加一場，等公佈。」

另外，鄧穎芝最近學電影特技，佢話幸好有跳舞底，所以好易上手：「旋風腿我一學就識，都好有型。」佢笑話男朋友大隻，平時練習唔會當對方沙包，但好鍾意咬對方：「鍾意一個人就會咬，佢一見我個頭遞埋去，佢就會縮開。」