想去奧斯卡頒獎禮？做金像影后珍妮花羅倫絲（JenniferLawrence）嘅老友就有機會喇。

於剛過去嘅奧斯卡頒獎禮珍妮花落車時仆親、撞傷雪糕筒時一手抓住嘅女仔，原來係珍妮花相識咗7年嘅好朋友Laura。Laura喺自己嘅網誌講番同珍妮花一齊去奧斯卡時所發生嘅事，佢同珍妮花講嘢都係咁直，好抵死爆笑。

1.俾珍妮花扯頭髮：「用我啱啱恤好嘅靚髮嚟幫自己止跌」
Laura寫到同珍妮花到達紅地毯一落車嗰陣，「我個date(指珍妮花)好似食咗屎，仲用我啱啱恤好嘅靚髮嚟幫自己止跌，在場所有人都陷入瘋狂，圍晒上嚟，但係就冇人問我使唔使幫手，喺奧斯卡如果你唔係出名嘅人，就會俾人當透明。」

2.去廁所：JessicaBiel幫我開門
Laura又話幾經辛苦先去到紅地毯嘅盡頭，諗住開場前去廁所，估唔到有謝茜嘉比爾（JessicaBiel）幫佢開門，仲讚佢條裙靚，Laura心諗:「冇人類配得上擁有佢嘅靚樣同身材」。

3.仲係喺廁所：遇《華爾街狼人》主角晒巨鑽
Laura入到女廁就撞到《華爾街狼人》嘅MargotRobbie，點知Margot騷手上巨型鑽戒俾Laura睇，仲同佢講：「其實我戴住呢隻戒指，應該要有陀槍保鑣跟住我，我好有可能被人擄走去墨西哥。」令Laura感到莫名其妙。

4.入場跌袋袋：卓寧泰坦幫我執
入到會場，Laura就話同珍妮花都超級肚餓，所以睇到一半就入去後台食pizza，仲見到好多得獎者同頒獎嘉賓。當佢唔小心跌咗個袋嗰陣，有型男卓寧泰坦（ChanningTatum）幫佢執，真係羨慕死人。

5.黐埋畢彼特嗰度：索體香
Laura仲撞到荷李活星級情侶畢彼特（BradPitt）同安琪蓮娜祖莉（AngelinaJolie），佢狂讚畢彼特陣除好好聞，忍唔住要問佢用咩古龍水，不過畢佬唔係用ChanelNo.5，佢竟然話：「我唔用古龍水，我諗係我嘅體香。」Laura喺個blog度好抵死咁寫:「我選擇唔去信佢，因為如果係真嘅實在對人類太唔公平」。Laura又形容安琪蓮娜真人好靚好優雅，佢同畢佬就好似太陽同月亮。Laura亦大讚姬蒂白蘭芝（CateBlanchett）真人靚過上鏡，話佢好似神話中嘅公主，令Laura覺得見到佢要行禮。

係咪好睇過鏡頭前嘅「三叔」最強合照呢？