當年今日
關於我們

【《麥路人》講親情】與楊千嬅首度合作 郭富城﹕係呢幾年最好嘅電影

蘋果日報 2018/12/14 17:15

楊千嬅郭富城麥路人

郭富城(Aaron)、楊千嬅、劉雅瑟同顧定軒,今日去到澳門「第三屆澳門國際影展暨頒獎典禮」出席電影《麥路人》發佈會。《麥》片講述一班缺乏親人關懷,以快餐店為家嘅階層故事。
Aaron話當年喺康城宣傳嗰陣,睇完經理人小美畀嘅電影大綱後,就覺得一定要支持呢部電影:「有好多被社會遺忘嘅人,通過電影了解佢哋生活,希望引起共鳴同關注,齣戲俾我有咁嘅使命,我拍時好投入,認為係呢幾年最好嘅電影。」
千嬅喺戲中飾演廟街歌廳歌手:「因為小美邀請,佢話好急,但劇本好好,故事講人與人之間關係好微妙,家人好親密,但係溝通唔到,陌生人可以變成家人。」千嬅首次同Aaron合作,第一次演劇情片就可以去到唔同影展,千嬅話:「我哋有對手戲兼且有感情線,整部戲好低沉,大家都控制到較低嘅情緒,所以好快帶到我入戲。」千嬅表示,拍完戲都會帶低落嘅情緒返屋企:「好彩我個仔同老公係我嘅鬧鐘,可以嗌醒我。」
對於古天樂獲提名「叱咤我最喜愛的男歌手」,千嬅表示已經投古仔一票:「喺2000年嘅時候我都同古仔有首慈善合唱歌《萬語千言》,當時我哋都唱得幾好,今次佢有提名,我即刻投佢啦。」
精選娛聞,喺晒《娛果》
http://fb.com/appledailyent
empty
楊千嬅話今次同郭富城係第一次合作
empty
郭富城話新戲令佢有一份使命感
empty
千嬅話拍完戲會帶埋啲低落情緒返屋企,好彩有老公同囝囝可以嗌醒自己
empty
(左起)劉雅瑟、郭富城、楊千嬅同顧定軒