惠英紅同張之珏今日到商台接受李居明訪問，單身嘅紅姐被李師傅指佢額旁夫妻宮有青根，所以命格趕夫，要到2026姻緣先至到，第二年結婚，李師傳話：「個男人係一月出世，留意個名有冇『生』、『龍』、『震』其中一個字，同埋最好屬牛或龍。」

而紅姐就笑住話：「都好，到時我67歲仲行得走得，不過我唔要小鮮肉，如果食唔住我，我會藐佢。」自97年後紅姐就冇拍拖，佢自爆曾經叫細佬陪自己去置地拖手撓手行街，感受拍拖感覺，不過細佬就拒絕咗。

李師傅指紅姐八字奇特，所以唔少相士都用紅姐嘅八字做教材，加上佢係慈禧太后後人，紅姐笑說：「我都唔知做咗教材，不過我依家係賤賤格格。」對於金庸離世，曾經演過六部金庸著作為題材嘅電影，兼當年獲金庸親自揀選演《射鵰英雄傳》中穆念慈一角嘅紅姐表示：「我凌晨點幾先知道呢個消息，我好認同每個人都要走，但係好難過，因為少咗一個提攜自己嘅伯樂。」

另外，今日到商台宣傳全新大碟《A SECOND CHANCE》嘅黃翊，話原先只打算做一首歌，點知錄錄吓就變成十首歌，咁順理成章就變成出大碟。今次亦係黃翊相隔26年後再出碟，雖然同監製合資六、七十萬，但黃翊就坦言無諗銷量，因為已經做到一張滿意嘅大碟已經心滿意足。

對於之前開騷後，被影到去醫院探望太太，黃翊話:「之前佢昏迷時有驚佢醒唔番，似有排嘆，醒番之後，前幾日精神幾好。」黃翊指太太係腎病患者，需要接受輸血或打補血針，初時太太覺得輸血效果比打補血針好，但因為輸血日後令排斥風險增高，所以依家就轉打補血針，幸好太太打補血針後感覺良好，依家等待太太情況穩定之後接出院，然後安排換腎。

同樣到商台宣傳嘅孫耀威，提到下月中開騷，佢話巳經減咗10公斤，但同目標仍爭2公斤：「我老婆同我講開完騷之後，都要keep住，因為好sexy。」而孫耀威又表示自己非常怕熱，所以騷上服飾都會鬆身通窿為主，佢仲笑住說:「有啲衫係一扯只剩底褲，我冇乜所謂，睇現場反應。」而佢又自爆以前開騷會真空唔著底褲，所以今次大家睇吓有冇3D神鵰效果。

精選娛聞，喺晒《娛果》
http://fb.com/appledailyent