有一樣關於退休金嘅問題實在好唔公義！就係吹咗好多年嘅全民種金（經語言偽術後稱：全民退保），種金打手打住「公義」做旗號，但呢個計劃本身就最唔公義，因為人人有份，連長實（001）主席李嘉誠都有得拎，即係身為打工仔嘅你，未養掂父母，先要供養李首富、呂次富、李三富……一路數落去嘅年老富豪。

點解咁不公義，都仲會有打手聲嘶力竭咁推動？噚日睇金融時報（FT），解開咗個謎？FT「公司及市場版」頭版標題寫：「花旗贏咗挪威退休基金合約」，呢啲退休乜乜，係門利益龐大嘅生意。香港已經有政黨話要留500億錢，加埋日後供款，隨時係個千億民脂民膏嘅「糧倉」。

至於點解全民到連李嘉誠都有得拎咁反智，班種金打手都要照背稿？因為唔撻全民呢個朵出嚟，個基金總額就唔夠大。資產管理生意，其實係做吸客，而唔係考眼光，因為基金收管理費，管理資產夠大，等於分得越多，表現係點其實冇乜所謂。如果香港最終搞「千億主權基金」，管理嘅基金公司每年收1%管理費，乜都唔使做，已經袋10億錢，仲未計其他可撈嘅著數。

金融海嘯之後，主權基金更加活躍，新聞方面傾向報喜不報憂，一面倒吹捧主權基金嘅大能，高明估計背後原因，係投資銀行生意淡薄，要轉型做資產管理，零售呢啲雞毛蒜皮，大鱷懶得做。香港雖然長年被諉化，但庫房有幾多錢就係實力，香港個庫房梗係會被大鱷謀住，而今日呢隻大鱷，多數唔係美帝，九成九會係紅色大鱷。

當年強迫金，19個迫金受託人係外資主導，點解？因為當年中資金融行未成氣候。今日香港政治生態，港鐵（066）要買強國車、港交所（388）互通又係通A股。「香港主權基金」呢嚿大肥豬肉，有咩可能唔係中資搞？

香港嘅管治「班子」已經係大陸委派，本地打工仔冇紅色背景都幾難做大企業（特別係投行）高層，自由行亦都搞到零售被大陸客主導，將來搞乜全民種金，百份百肯定由中資行管理，香港人連退休命脈都被大陸鏈住。最慘唔少全民種金打手，係自己友香港人。

末代港督彭定康講過，「我感到憂慮的，不是香港的自主權會被北京剝奪，而是這項權利會一點一滴地斷送在香港某些人手裏」，全民種金又係一例證，教人黯然垂淚。

高明
偶像派財演高明Facebook專頁：www.facebook.com/AppleKoming