禁毒宣傳片宣揚「take嘢衰硬」,末代會考生阿Ken成績單上連F級亦欠奉,家住屯門的他無心向學,自15歲起,飲酒吸煙已是等閒,一年前開始索K:「以前喺屯門間中都有索K,識咗班friend咪出九龍飲酒囉!成日都心思思想玩番(K仔),問佢哋,佢哋就介紹我去先達攞,仲話啲嘢又平又純。」
先達廣場人來人往,警察也多,阿Ken坦言買K一步一驚心:「我幫襯玩具舖半年,頭幾次去真係好驚,上到三樓好似有幾十隻眼望住,心諗俾人拉咗呢世就玩完,但攞多幾次好快就習慣。開頭每次買一包分兩次食,都係100蚊,之後『壇數高咗』,每次要索兩、三包先夠喉,索完特別大膽,飲埋酒仲勁,有次試過喺酒吧同人嘈交再開拖(打架),跌落地成手損晒都唔覺痛,後來玩到冇錢玩,介紹朋友去買,夾錢食。」