硬要話我係晨操派，我認！但我亦會專心刨賽績，最鍾意去搵指標賽事，尤其隔籬左右有表現之馬，再出跑得好成數極高。

就以上周六（13日）為例，頭場「龍城勝將」前仗初出壓倒受讓14磅的「霽月高風」跑第三，後駒再出補中，結果「龍城勝將」以6.2倍贏馬。

第五場「繽紛駿驥」前仗跑第四，跑第三及五名「舉世無雙」與「巴基之友」統統再出再贏，結果「繽紛駿驥」有7.6倍掄元，例子經常發生。

又引用一個反例證，明星馬「上簽」上季尾大敗，死因就係太多快馬鬥燒，剛戰形勢一樣，重蹈覆轍，臨場回飛說明一切，蹄下敗將「豹子頭」就係賺快步速下反勝。

這兩匹泥地明星馬下次再碰頭，負磅、評分拉近，就要睇「上簽」有冇馬同佢鬥燒。

刨馬奧妙之處，就等如尋寶遊戲一樣，要搵一場指標賽績，就要細心分析，「龍城勝將」及「繽紛駿驥」之所以贏馬有6至7倍上佳倍率，主要是鞍上人不是明星級騎師，若果配上潘頓或雷神，早就係大熱門雞肋賠率。

這天（15日）公佈周四（18日）谷中賽事排位，初步睇好第四場「佳運喜」，前季71分起步，今季36分在徐雨石馬房重新出發，上仗初出跑1800米即第四，第二名「潮州小子」及第五名「皇牌」分別再出上名及贏馬。

上仗讓「皇牌」一磅，今勻調轉受讓四磅，李廐散倉馬從未用過，冷門不妨諗諗佢。