煲呔曾蔭權周圍推銷自己嘅治港理念,滙豐銀行亞太區主席鄭海泉喺其他場合,亦都畀咗小小貼士煲呔。佢話政治要有新嘅治港機制,好似前國務院總理朱鎔基話齋,千祈唔好議而不決,決而不行,令香港自己原地踏步,但係四周圍嘅地區,就繼續向前發展,咁樣大家都唔想。
佢話,過去幾年政府提過好多大構思,最後都落實唔到,令市場懷疑。其實香港由工業、運輸發展到物流、商業中心,政府都無講乜嘢,係香港自己不斷努力。佢話,香港唔需要話要乜嘢模式,政府應該喺架構、效率、人才等方面提供資源,支持教育、基建、法律等,為經濟自由發展提供更好嘅環境。
不過,講到底,鄭大班話,翻看煲呔紀錄,佢都以市場經濟發展為主導,並且奉行積極不干預政策,相信唔會有太大改變嘅,所以呢位滙豐大班,已經簽咗名去支持佢做特首。