財政預算案出爐之時，撞正3.11選舉在即，自然凶多吉少，結果政府唔肯全民派錢，順理成章全城鬧爆，又難怪建制政黨氣上心頭，據聞已經部署緊，以此為3.11補選敗選「原因」，方便向西環「交差」。

又講真，從得票嚟講，九龍西、新界東同港島區嘅民主派選票，根本就拋離建制派，喺形同單議席單票制嘅補選中，建制派若然三區直選都敗選，其實都好正常，最怕有啲政團或組織頭目吹到好大，講到有勝算云云，最終若然敗陣都要寫報告，賴乜嘢好？似乎賴唔派錢都幾好！

一向有自我一套理財哲學，唔多隨波逐流嘅前財爺梁錦松唔知係咪對此睇唔過眼，是故今日出席一個活動後話絕對唔認同喺預算案全民派錢，反問如果要全民派錢，點解要納稅？不點名話有政客要求派錢，係「買票」行為兼為選舉喊「民粹式」口號，認為邊啲政客係「愚蠢」，相信市民看得出。

咦咦咦，心水清嘅人士都留意到，預算案叫過政府派錢嘅政黨，其實唔只民主派，唔少有派員參選嘅同建制派都有份噃，阿松竟然係3.11前咁「敢言」，小心又成為敗選矛頭所指呀。大家都知啦，姓「賴」以及上綱上線搞標籤，永遠都係補選前最常見嘅做法。唔知現屆財爺陳茂波，會唔會多謝阿松仗義幫拖？

【倒數1日】立會補選新聞 《蘋果》一網睇晒
http://bit.ly/appledaily311