KC要死！唔係呀嘛？

《愛‧回家之開心速遞》入面飾演怕事Terry嘅李偉健，今日喺ig貼咗一張拎住KC(歐瑞偉飾)嘅車頭相，真係大吉利是！見李偉健個樣超傷心咁留言﹕「284集 (祈求天地放過一雙戀人)………… 別了………………3月26日 星期一 8時見。」劇情係點？咁梗係賣關子啦，不過有精明嘅網民就一語道破﹕「我直覺這只是他們的幻想情節，所以不太擔心編劇又給我們『驚喜』。」

今日《愛·回家》一班演員劉丹、呂慧儀、林淑敏、謝芷倫、許家傑等喺長沙灣做宣傳，仲邀請多個家庭一齊玩遊戲慶祝復活節。「大家姐」林淑敏又爆咗少少劇情，透露同許家傑嘅戀情，會多一位第三者，林淑敏話﹕「會有個香港先生加入，但暫時要保密。我好多人追㗎，好開心身邊咁多肌男。」被人撬牆腳，許家傑一啲都唔擔心話：「我未知對手係邊個，不過唔擔心，我咁有魅力唔會輸俾佢。」

另外，張景淳亦因為要拍其他劇集要離隊，有網民發起「龔燁行動」，呂慧儀喺台上問：「你哋支持龔燁行動嘛？」點知大家反應竟然係...「唔支持」。呂慧儀笑話﹕「我會同佢講唔好盡信網上留言。」

精選娛聞，喺晒《娛果》 http://fb.com/appledailyent