政府冇啦啦想掟400億搞亞運，但喺扶貧、房屋等民生問題上就繼續做守財奴，難怪網上民意一面倒反對申辦亞運會。民政事務局副局長許曉暉噚日出席《城市論壇》講申亞，節目未開始就講明一陣會請班維園阿哥飲茶慢慢傾，成功冧到班哥仔同佢理性討論問題。一眾哥仔仲開心到叫許曉暉升呢做局長，而冇出席論壇嘅德成局長，就應該燉冬菇做政治助理算數。
維園阿哥準備咗「亞運有錢使，民生冇銀用」嘅標語，仲喺節目直播之間嘅廣告時段，高叫呢句抵死口號，搞到主持謝志峰苦笑話，自己做得佢哋老竇，勸佢哋唔好咁啦。峰伯最後仲搞埋gag，話「有運動，冇暴動」嚟打圓場。

學者轟體育政策脫節

論壇上，許副局只係重彈德成局長老調，話搞亞運不要大白象，係對市民健康嘅一項投資。
反而民主黨立法會議員甘乃威表現OK，踢爆東亞運喺將軍澳嘅主場館最初造價話要2.9億，結果埋單成3.9億，超支35%；高鐵最初造價只係約300億，到咗今年初正式申請撥款，竟然要成669億。甘威好擔心若然真係搞亞運，可能要成600億先夠找數，唔係政府所講嘅400億。
浸大體育學系副教授雷雄德都話對申亞又愛又恨，佢批評政府嘅體育政策脫節，例如佢哋眼中嘅主流康體運動仲包括木球。論壇舉行期間，有幾位後生仔喺觀眾席上無端端吐出假血，之後就快閃離開，唔知係咪想諷刺政府大花筒，令小市民嘔血？

許副局冧掂維園阿哥

論壇完結後，許副局同班維園阿哥去小食亭買嘢飲，有四、五個便衣警察實，班哥仔就相當斯文，好和平理性咁同副局討論問題，話怕亞運變成高鐵翻版，叫政府不如投放多啲資源培訓精英運動員好過。許副局只係用咗百幾蚊買嘢飲，就到班維園阿哥鬼咁開心，其中馬草泥更高呼：「民建聯何懼之有。」呼籲民建聯唔好成日缺席《城市論壇》。

mailto:[email protected]