阿松新官邸全面睇 - 李八方

蘋果日報 2002/01/17 00:00


阿松噚日招呼第二批記者到新官邸坐坐,八方今次身歷其境,覺得上個禮拜嘅描述不中也不遠矣。
阿松以前住處一直是個謎,全港傳媒都搵唔到,噚日佢終於自爆未上任前原來住喺白加道,剛好喺政務司司長府邸旁邊;問到佢住喺壽山村覺得點,佢話其實兩處不同風景,各有好處,佢自己亦住過呢區。
原來美國大通銀行嘅福利好好,高級人員有屋提供,但係冇家具,要置私貨,阿松轉了工,就將枱櫈同地氈都搬進官邸,由於基本色調係米色同啡色,所以冇法子用煲呔啲綠色窗簾布同地氈,原來係咁,唔係阿松唔鍾意綠色。
阿松呢份工當然唔易做,佢話都預咗好辛苦,只係冇預到「九一一」啫,班公務員同立法會議員都唔係咁難合作,佢重笑自己十幾年嚟一直有參與公職,算係「睜着眼」加入公務員隊伍,所以唔會覺得被騙,反正阿董盛意拳拳,佢亦難得有機會為港人服務。
當然,講到減人工入政府呢個敏感話題,阿松就再三講,唔好針對錢,佢對有傳媒就「戇居」二字提出嘅批評認為均是善意,反正已有港大護法徐詠璇同佢解咗畫,證明兩個字係班大學同學因佢入政府送畀佢,而且兩個字擺喺二樓,唔登堂入室都睇唔到。
八方今次冇咁好彩有戲睇,只係食咗啲點心糕餅,問佢個大廚係邊度人,阿松話唔知,佢老兄其實邊得閒喺屋企食飯,連個網球場都冇用過,真係有啲浪費。


E-mail:[email protected]