正所謂「人多好辦事」，但係上周五馬刺作客老對手小馬，比賽尾段落後兩分嘅時候，唔知博懵定無心之失，竟然派咗6個球員落場，不過6打5都係入唔到波，結果比數維持111:113完場，俾小馬場數追成3:3平手，要鬥到Game 7決勝負。（now635台明日3:30am起直播）
其實今場馬刺帶住5分領先優勢進入第4節，雖然柏加呢節入咗13分，但對面艾利斯都入12分，包括尾段連入兩個罰球，幫小馬領先5分；柏迪米爾斯見咁嘅情況，就即刻轉身射個3分波，追到落後兩分。完場前剩番1.3秒，艾利斯離奇將個波掟出場外，畀咗最後一射嘅機會馬刺。唔知有心定無意，應屆最佳教練普波域治安排咗戴奧後備落場負責開波，但有入冇出，令到場上同時出現6個馬刺球員；而亦可能因為呢個係關鍵時刻，連球證都太緊張投入喺個比賽氣氛，竟然走漏眼。

聯同網隊一齊搶7

不過人多打人少嘅馬刺都攞唔到着數，最後柏迪米爾斯絕殺失敗輸波。鄧肯賽後就總結：「我哋今場犯咗太多錯誤；最後1節俾對手入到37分實在係太大打擊。」
至於網隊同日亦成功喺主場絕地反擊，迪朗威廉士交出23分，以97:83贏咗速龍，令今屆季後賽一共出現5場波打到場數3:3，周日上演終極一戰。