人妻舒淇同吳雨霏（Kary）今晚喺中環為「Armani Box」概念展覽揭幕禮擔任嘉賓，出席嘉賓仲有黃芷晴、莊思明同Super Girls等等。

Kary話啱啱先喺加拿大出席完細佬婚禮，兩姊弟感情好好，仲有同細佬分享夫妻相處之道，Kary話：「我哋由細到大感情好好，好close，佢o依家成家立室，真係好感動，我有喊，我爹哋講講辭嘅時候，都每兩、三分鐘停咗喺度喊，講唔到嘢，我結婚都冇，所以我同爹哋講我呷醋，但大家都好錫細佬。」Kary話送咗份家庭用品厚禮俾細佬做結婚禮物，問佢有乜訓示俾細佬時，佢話：「做女人一定會企番女人嗰邊，知佢同太太都經歷咗好多嘢，睇住佢哋結婚真係好感動。」