數碼年代不可一日冇facebook，噚日八方玩FB，赫然發現原來陳日君樞機都有玩。樞機退咗休果然唔同啲，有時間喺虛擬世界活動，上網結交吓朋友，唔似得以前忙到冇覺好瞓，睇嚟佢隨時可以角逐FB最年長會員。
八方一click入去，首先見到樞機個嘜頭，入面仲有佢個牧徽，佢話自己嗜好之一係「吃東西」，又話「參與社會事務和當社會有不公義的時後（應為「候」），我便會出聲。」再碌落去，見到「主教行山團」嘅相簿，樞機着咗件藍色恤衫行山，嘩，好大個肚腩呀！呢條車胎一直隱藏喺主教件袍入面，收得好埋，樞機唔着便服真係好難發現。

冒名開facebook

八方睇睇吓，越睇越覺得唔對路，開始覺得有啲奇怪，點解樞機得五個朋友嘅？個人資料嗰度點解仲話自己係正權主教嘅？唔通呢個唔係樞機！？於是即刻拎起電話打畀教區中人查證，佢哋證實，原來呢個account根本唔係樞機所開，係有人冒名所為。教區中人指樞機家忙於寫blog，大家可能覺得佢既然有寫blog，玩埋FB都唔出奇，受騙同假樞機做朋友嘅人當中，有一個大家都識，就係公民黨立法會議員梁家傑。

梁家傑都中招

梁家傑記得年幾前收到「假樞機」嘅邀請，佢見係樞機就接納咗做朋友。佢話呢位「樞機」唔算活躍，冇乜出post，雖然家知道個賬戶係假嘅，不過佢認為冇所謂，反正佢都將自己個人私隱權限set到最低，唔係朋友都可以去到佢個FB，所以誤交「假樞機」都冇乜損失。
今次揭穿假樞機藉FB玩嘢，大家第日上網都要小心啲，其實呢次唔係首次有人網上扮樞機，以前曾經有人以樞機名義寫blog，又係有齊個人資料、相片，總之就搞到似層層，警覺性低啲都隨時中招。上網喺FB識朋友記得帶眼識人呀。
mailto:[email protected]